Кога Feist се пофали дека на гостувањето кај Џулс Холанд си климале со Брет Хиндс од Mastodon и си се фалеле меѓусебе колку им се добри рифовите и тонот, цурата кај мене си го зголеми и онака високиот скор на одобрување. А со тоа што новиот албум го крсти Metals, Лесли си обезбеди посебно место во мојот педантно чуван пантеон на омилени пејачки и кантавторки. Не оти таа се стресе што поентирала или си осигурала место во нечиј замислен храм. Не дека наеднаш станала металка. Цената на нејзините акции скокна зашто на брадестиот гитарист му постави суперкул прашање: How about Metals meeting metal? Гласниот убиец на шесте жици не знам што и дали одговорил, но нивната, најпрво, забавна, а потоа, интригантна, средба ме потсети зошто и претходно ми се допаѓаше артистката од Нова Скотија. Таа е од Канада, ама во својот звук крие жестина збиена како кај солисти од јужните делови на САД.
Feist и на четвртиот студиски албум е доминантно поп-авторка, но само слушнете ја, дури и несконцентрирано, The Bad in Each Other, па потоа тврдете дека тој риф не е како искорнат од запечените и песокливи краишта на Ју Ес Оф Еј. Затоа и изјавата да ги спои сопствените “метали” со металот на Mastodon ми делува возбудливо (веќе не го издвојувам овој детаљ). Тој црвено-бело-син фолк е присутен во мали дози, но сосема доволни за стави посебен печат, а можеби и да го зајакне кредибилитетот на целината. Таа, пак, несомнено не е уберхип, не е компактна како што е The Reminder, ама дури и опсесивните трагачи по влакно во јајцето веројатно ќе мора да си признаат дека Metals е полн, содржаен, исполнителен албум. Пробивот на плочата од 2007 година ја крена рампата на очекувањата и во тој поглед, госпоѓица Лесли потфрла. Ова не е бомбата од неколку мегатони креативност за кои што мнозинството се подготвуваше.
Metals е експлозивна авторска направа со 999 килотони што е екстремно посилно од мнозинството пувежи што се испуштаат од отворот за прочистување на меинстримот. Знам, Feist е премногу фина, слатка и воспитана. Нечуено е зборови толку непријатно сликовити да се употребуваат во нејзина близина, но и покрај забележливата нежност, воопшто не ја доживувам како кршливо суштество што ќе крахира ако не ја тинтрате непрекинато. На албумов Лесли покажува емотивна и уметничка снага што потсетува на Тори Ејмос во раните, најплодотворни, години. Нема до толку тврдо јадро како 48-годишната арт-локомотива од САД, меѓутоа, дека се близу покажуваат траки како A Commotion. Таа е делумно гневен отскок на воглавно смиреното, задлабочено, цеде. Со извесна доза шизофренија оваа нумера го разбива албумот, што потоа продолжува по барокната, камерна, насока на The Circle Married the Line и на Bittersweet Melodies.
Насловот на оваа композиција го нуди можеби најпрецизното сиже на материјалот. Тој е истовремено горчлив, сладок и мелодичен. Не станува збор за откровение, албуми со сличен спој се снимале, а ќе се создаваат и во иднина, но остриот, благуњав и певлив вкус на оваа плоча е исклучително фајстовски. Изобилува со драматичност нагласена од оркестрациите, смирува со гласовниот пудинг и се влева во крвотокот со умниот избор на ноти, рифови и хармониски решенија. Расфрланите семиња дисторзиран и акустичен рок изр’туваат во мала градина од мелодиски растенија што сè прегрнуваат и обвиткуваат со пријатна топлина. Стиховите, што воглавно црпат зборови од љубовта, целината ја заокружуваат со дебела линија со силна чувствена боја. Feist решила дека Metals е збор што најмногу соодветствува со суштината на дискот, но тој не е студен и здрвен, како и физичката форма на која што е сместен. Содржи метали, меѓутоа, тие се од посебен, леслиев, периодичен систем на елементи.
Оцена: 80/100
Артист: Feist
Албум: Metals
Датум на објава: 4 октомври 2011
Продуценти: Чили Гонзалес и Моки
Издавач: Polydor
Листа на песни:
1. The Bad in Each Other – 4:44
2. Graveyard – 4:17
3. Caught a Long Wind – 4:54
4. How Come You Never Go There – 3:24
5. A Commotion – 3:53
6. The Circle Married the Line – 3:22
7. Bittersweet Melodies – 3:56
8. Anti-Pioneer – 5:33
9. Undiscovered First – 4:58
10. Cicadas and Gulls – 3:16
11. Comfort Me – 4:04
12. Get It Wrong, Get It Right – 3:39
[related_posts limit=”3″ image=”35″]

